藍衫嘅係VNL week 2喺菲律賓打出個名堂嘅Luciano Vicentin（阿根廷17號，22歲）。Image from Volleyball World.

非專業睇排球

其實即係睇靚仔（好似係）

因為鐘意睇排球嘅關係呢，我貨咗金睇VBTV，呢個好似係世界排球聯會官方出嘅app，俾大家可以唔使親身到場都睇到唔同嘅排球比賽（沙灘排球都有得睇）。

而我都學咗一陣排球咁樣喇，不過又疫情又乜又物咁樣，我都只係學咗兩堂，所以都仲係喺咩都唔清楚嘅狀態。

排球國家聯賽（Volleyball Nations League，簡稱VNL）喺呢排打緊，一個禮拜係女子組，一個禮拜係男子組，合埋打足兩個月。每一日都有幾場比賽睇，自然就會睇多咗（唔好嘥咗自己D錢呀嘛，75USD年費㗎都）。

由於我愛隊係阿根廷嘅男子隊（有睇我上一篇講排球嘅就知點解㗎喇），所以我今次就唔講咁多隊伍嘅嘢喇（一嚟因為冇追其他隊，二嚟上次有講好多咩）。所以今次主要都係繼續講人。

究竟教練可以點玩？

2022 VNL阿根廷超啜核setter用法

阿根廷隊總教練Marcelo Mendez。

由於阿根廷大隊長Luciano De Cecco（15號）喺意大利chur完，佢決定要放個大假先（and approved，睇佢個blog然後Google translate先知道大概係咁，34歲老人家你就放過佢喇），VNL佢後join，所以VNL week 3喺大阪就會見到佢。

出得去都係要有個隊長先得，所以頭兩個禮拜就搵Martin Ramos（18號）頂住先。頭兩個禮拜出去嘅人佢好似係第二大，30歲。

由於大隊長係setter，所以頭兩個禮拜嘅VNL入面，阿根廷隊嘅setter位就要交哂俾二把手Matias Sanchez（1號）同三把手Matias Giraudo（77號）負責。

其實De Cecco同Sanchez喺上次講排球篇文講過嘅，不過我可以再提下大家佢哋幾高。

有D Google search係黐線㗎，我問最矮係邊個，佢有時會出最高係邊個，想點？

De Cecco有194cm高（佢自己講嘅），Sanchez得173，而Giraudo呢就有196㗎。嗱，雖然Sanchez喺平常人嘅世界入面佢嘅身高真係好正常，但係喺男子排球嘅世界入面佢係小矮人，呢樣真係冇得唔認嘅。