幅圖有聲。Photo by Yuri Cortez / AFP

男人打排球

利申：我冇睇《男排女將》

今屆東京奧運尾二嗰日，我去咗我家姐屋企睇BB，我開電視，睇住96台，咁啱佢播緊男排銅牌戰（即係阿根廷對巴西）。

由於我細個睇嘅都係女排，所以唔知男排有咩好睇。上一屆我好似都有睇兩分鐘左右就轉咗台，因為好似「嘭」咗兩三聲就完咗一球，好快搞掂。當時感覺男排同男子體操都係嗰味嘢：力的表現。

呢D男女stereotypes嘅問題我都會記起自己喺12年問Facebook點解冇男子藝術體操。答嘅朋友都只係講美感同「力的表現」嘅問題，其實我覺得答唔到我。又話要兩性平等嘅？點解到而家都仲有運動項目冇男人參加㗎？我想有人好明確咁答到我，點解到而家都冇男子藝術體操同男子韻律泳啫。有嘅話我好樂意去學絲帶舞。

不過我今年冇轉台，我諗應該要多謝伍家謙嘅神助攻。

嘩，呢個真係可以話係講英文嘅人之中最不幸嘅姓氏。（當然，人哋個姓本身係西班牙文）咦，咁啱呢場佢有落場喎，睇下佢嘅表現先。

當然喇，一睇就會睇哂成隊。結果一睇，嘩，隊波打得咁熱血嘅？

嗰刻開始，我好希望阿根廷贏到呢場波。第一局，我真係喺電視到睇住佢贏嘅，但係第二局就睇得出佢哋喺劣勢，俾巴西㩒住打。

不過好快我哋要一齊出街，所以我都只可以喺Google睇即時比數。唉呀，第三局俾巴西反超贏咗呀。嗰刻我心入面只有希望阿根廷贏到第四局，咁先有得打落去。

阿根廷第四局又贏得返喎，咁就可以打到第五局決勝局喇。

贏埋，好嘢！睇片真係睇到好似開party咁款。

自此，我就做咗阿根廷男排嘅fan屎。

我都要講返呢句：個個睇阿根廷通常都係睇踢波，睇美斯，但係我偏偏係睇男排。