Intern記（五之一）

倫敦好大，個半月唔會玩得哂

轉眼間，上一篇文之後拖咗兩年先寫呢篇，拖到咁都係要寫嘅。見預計嚟緊呢個月（29/7/21開始寫）返工會忙喎，咁我不如寫D要慢慢寫嘅嘢喇，即係我嘅第二次倫敦旅行回憶錄。

懶得搵自己嘅相。Photo by Luke Stackpoole on Unsplash

雖然名義上叫internship，但係咪又係俾次機會一班大學生出國旅遊咁樣，呢一轉（2017年7－8月）都玩咗一個半月㗎。係用working holiday visa申請過去有D蝕囉，不過我就趁visa未完之前（2019年2月）去多咗次㗎喇，算係有個交代俾自己喇。

其實上面真係因為拖得太耐所以先寫返少少background落去。不過又講返，我當年去倫敦嗰陣，呢幾個同一間agency嘅香港朋友，並唔係我喺倫敦呢段時間唯一可以一齊玩嘅香港朋友，我仲有香港朋友咁啱喺嗰段時間去咗倫敦，所以我有其他朋友可以同我一齊周圍去嘅。

聽落好似好多個，咪又係得一個咁大把。

咁我都係逐D講喇。

第一個：我嘅其中一個gay friend同埋佢個Irish sugar daddy

首先，gay唔係問題。問題係，我識嘅gay friends都有一個通病：鹹濕（定係我應該直接話佢哋淫賤？）。

天下男人皆鹹濕，我明嘅。（反白眼反到上天花板，但係班鹹濕佬應該當我係高潮眼）

我呢個friend好似係喺佢讀PGDE嗰陣（2016年尾）唔知點解可以去愛丁堡交流，然後又唔知點解識到佢呢條仔，但係年紀上真係大一截。Obviously人哋都應該四十幾歲喇啩。自此之後，佢哋兩隻冤鬼就會喺自己嘅長假期飛去對方嘅城市都見面兼玩下。

所以我喺17年中第一次喺倫敦見佢兩個，跟住17年尾喺香港見多次，跟住去到19年我仲要係倫敦見多佢哋幾次。真係，唉。

我呢個friend好似早我一排落地，所以我當年去到倫敦冇幾多日我就已經去搵佢。

At King’s Cross Station. Photo taken by Anthony Li in July 2017.

事先我唔知佢條仔住邊，所以我都係等佢約我去邊度等方便佢。佢約我去大戰橋（King’s Cross）火車站等佢。係喎，都醒唔起呢條友係遲到慣犯，好似係約佢1200，結果佢1215先施施然喺火車站出現（算早）。

「喂，怨婦，熟唔熟呢個area呀？我帶你去佢屋企嘅同時帶埋你行下呢個area喇。」