Intern記（四）

同時期跟同一間agency去倫敦做intern嘅學生係點呢？

西曆2017年7月14號（我到咗倫敦兩日左右），我收到陌生人嘅WhatsApp。

我要用網絡版WhatsApp先cap得返多少少。同埋時間係香港時間。

當時，我對返堆電話號碼，先知原來呢幾個number係同一班跟呢個機構介紹去倫敦做intern嘅人。

其實，最初頭我都唔諗住好理佢哋。去得外國梗係想識多D鬼仔鬼妹㗎喇，仲諗住識班香港人咩？

再check埋個list，得六個人。恒管（當時仲未改名㗎）有三個，LingU有兩個，得我一個係PolyU嘅。四個讀商科，兩個讀文科（包括我）。但係讀文科嗰個係cultural studies嘅呢，我係純語文科㗎。

所以，first impression就係：傾唔埋㗎喎。

不過，我都係應咗。

都係嘅，有人照應都係件好事。我哋都應驗咗。

我哋六個人，有一個只會覆message，真人永遠神隱嘅少女。留喺倫敦嘅時間同我哋另外五個都唔係完全夾哂，所以我哋對佢「保持神秘感」都唔覺有咩大問題。

我哋另外五個，就算喺倫敦，住嘅地方都差好遠。淨係睇大家住喺倫敦地鐵邊條線都見到差好遠：兩個（包括自己）住Northern line High Barnet branch，一個住Central line市中心偏東位置，一個住District line倫敦東部，仲有一個係住地鐵去唔到嘅Croydon。

再問返大家喺香港住邊，其實件事都係差唔多：我哋一個觀塘，兩個馬鞍山，一個荃灣，同埋一個粉嶺。

喺香港又好，喺倫敦又好，我哋要約埋一齊，最方便都係出市中心。

然後大家玩完之後散場嘅餘興活動，就係大家鬥快返到屋企，然後喺WhatsApp講。

最快嘅當然係偏東嗰兩個喇，最近市中心就係佢哋。跟住係住Croydon嗰個，佢嗰度雖然冇地鐵，但係都仲有鐵路服務㗎（只係我唔識），所以佢都好快返到去。

最後淨返我哋兩個住北邊嘅朋友仔。由於我住嘅芬梨中心喺zone 4頭，佢住Totteridge & Whetstone就喺zone 4尾，我返到先係十分正常嘅。不過我哋兩個係特慢，因為我哋發現搭巴士平好多（巴士£1.50 vs 搭鐵好似最少£2.50，起碼爭十蚊港紙），我哋通常都係搭巴士返歸。

我哋五個齊人影相原來係咁難，係倫敦嗰陣原來得一張咁大把。因為我冇講過俾佢哋聽我會post相喺呢度，所以我決定遮哂佢哋嘅樣先出街。不過有一位會share Medium嘅文，我懷疑佢有account喺度。

總之，我哋幾個都會約埋一齊出去玩嘅。而且，我哋幾個都幾傾得埋㗎。返咗香港之後，由於大家都唔多得閒，所以我哋都只係約咗一次啫。我諗又係時候約下佢哋喇，因為我諗住就嚟又去英國喇嘛。

今次決定草草收個尾，我哋幾個去唔同地方嘅事之後有時間先慢慢講。