Member-only story
講執屋
每次嘗試執屋都係一次煎熬
話說我轉到工喇yeah（跳起）。其實二月尾已經返緊，我仲喺度熟習緊新環境。
咁呢，我娘親就成日講，等我轉咗工之後就同我間房大執下。咁所以我自己都喺度好努力咁執嘢，清理下我多年嚟嘅垃圾同埋唔再用嘅嘢。當然我都會嘗試執埋間屋嘅其他地方喇。
但係我發覺，我間屋係執唔到㗎。
粉嶺暉明路八號雍盛苑，2000年入伙，我屋企就係喺嗰個時候走咗入去暉明路做開荒牛。（連埋我間小學，五旬節靳茂生喺99年分拆，我哋上晝班係嗰年過去暉明路十六號嘅于良發新校舍，我同我二家姐喺99年已經入咗去開緊荒，大家姐99年小學畢業所以唔關佢事。）
而我屋企都算好彩，因為我哋只係喺祥華邨搬過去，當年都有唔少粉嶺街坊係一齊走嘅，搬屋應該都唔使咁貴。所以即係咁，我屋企其實仲有唔少傢俬／物品係喺住祥華邨嗰陣就用緊。
我祖父輩喺1984年喺祥華邨開嘅時候就搬咗入去，計返去到而家，呢D嘢都有差唔多40年歷史。呢D物品包括我屋企到而家都仲用緊嘅雪櫃。（係就係老爺機，但係用得就繼續用喇，呢個算數。）
當然喇，搬咗過嚟都有添置新傢俬嘅，而呢D傢俬都用咗廿年。屋企入面退咗役嘅家庭用品包括：電視機（而家係第三代服役）、大冷氣（而家服役嘅係第二代，兩代都係開利）、坐檯電腦（「大電」喺2001年左右服役，Windows ME嚟，用咗幾年，2005年左右陣亡；「小電」喺「大電」陣亡冇耐服役，Windows XP嚟，用到我二家姐2017年嫁人，因為我家姐嫁咗而宣佈退役。而家我同我大家姐都用notebook，大家姐嗰部notebook係Windows Vista，2007年左右服役，因為家姐而加買咗MacBook所以「小小電」喺屋企鋪塵多年；我而家呢部notebook喺2011年開始服役，Windows 7嚟，我諗都差唔多要幫佢搵下繼承人㗎喇）、床（全家都係第二代床服役緊）等等。
除咗呢D傢俬都仲用得，真係未爛未壞都唔會搞嘅之外，其他嘅物品都唔容易執，因為總會有個人會出嚟話「呢樣仲用得，唔好揼」之類，尤其係我呀媽。
所以我對於執屋，而家真係處於半放棄狀態，所以我講下我喺屋企執到D咩出嚟會開心D。
