黨鐵改收費結構嘅話學倫敦得唔得呢？

一個城入面基本上6個zone搞掂

因應馬鐵延線落啟德，黨鐵又俾人話車費結構有問題。

係呀，咩「屯馬綫一期」呀？根本成條屯馬綫計大圍至啟德段應該係第五期。第一期係屯門至南昌，第二期係大圍至烏溪沙，第三期係紅磡至尖東，第四期係南昌至尖東呀嘛。而家呢段時間叫住做馬鞍山綫完全冇問題。仲有呀，我始終覺得呢條綫叫青山綫Peaks Line最好。

好文推咗先：

點解 #火車未到站？因為成日話鐵路車費貴嘅同時，又睇下以前點樣訂價

點解 #火車未到站 ？因為當「鐵路2.0」係帶嚟新體驗時，車費表制訂仍然停留在1.0嘅位置

點解 #火車未到站？因為當兩間公司三個收費區，好似瀨尿牛丸咁溝埋一齊，會係「清新脫俗」定係「黯然銷魂」呢

其實個車費結構嘅問題，喺九龍南線（即係柯士甸站）通車嘅時候已經有人提出。然後而家到顯徑站車費好大問題。

同埋講個地名問題：顯徑邨係因為好大，橫跨顯田同徑口兩個地方所以房署先將個公屋名用呢兩條鄉村瀨尿牛丸解決咗佢嘅。然後到呢個新車站開嘅時候，你唔睇下個站近邊條村近D嚟改名，就走去搵條公屋嚟改站名？兩條鄉村先係本身嘅地名喎。

其實因為鐵路網絡越嚟越複雜所以衍生出車費結構嘅問題，但係又冇辦法改，可唔可以話係當年嘅兩鐵合併太過短視呢？

點解佢哋當年唔諗下重組成個車費結構，只係單純地合併同你減車費呢？（兩鐵合併當年我中五，我冇say。）

好喇，假設有得重整個車費結構，有咩方法改呢？

我諗到有三個：

1. 逐個站用最短行車距離由頭計過，不過一開北環線/總之有新線令到某兩個搭鐵好兜嘅站近咗就又死俾你睇。