粉嶺暉明邨，2019年10月攝。

粉嶺好藍？我不許你這樣說。

居民話你知

經過今年年初一政府話計劃可能將粉嶺暉明邨攞嚟做隔離設施定臨時醫護人員宿舍之後，年初二附近嘅粉嶺居民堵塞暉明路兼入去暉明邨高溫消毒，然後記者上樓發現都準備得七七八八之後，粉嶺終於再次上新聞。

不過身為暉明邨隔離嘅雍盛苑居民，我可以同你哋講，雍盛呢次爆發小宇宙係十分正常，亦係身為雍盛居民嘅合理可見結果。

順便講埋，好彩民建聯劉國勳落咗選咋，唔係嘅話琴晚昇暉泰暉著火之外，雍華都著火㗎，劉國勳辦事處喺雍華閣㗎。不過劉國勳仲死攬住個立法會議席，所以搞到新任區議員新民主同盟林淑菁冇辦事處，好似暫時同華明邨同樣係新民主同盟嘅陳惠達share個辦事處一齊做嘢。

但係我同唔少粉嶺嘅朋友睇到網上面好多嘅post都話D咩

• 「嘩，粉嶺藍到黑咁，擺舊隔離設施喺你哋度，抵死。」
• 「嘩，粉嶺藍絲一夕變黃，路障同魔法威力勁到黑警都唔敢亂嚟，只可以示範一次。」
• 「都係D藍絲自私啫，喺自己屋企隔離做呢D嘢即刻群起反對。終於知驚喇咩？」
• 「嘩，粉嶺獨立呀！」

我哋成班粉嶺朋友好唔滿意D人咁樣講。咁不如睇下粉嶺係咪真係咁藍？

青天白日反攻大陸藍

國民黨藍

我相信好多人都知道調景嶺當年俾人叫「小台灣」，同埋好多國民黨人喺嗰度。但係好多人唔記得，香港仲有其他地區都會大肆慶祝雙十節㗎。

其中兩個係石硤尾邨同粉嶺聯和墟。

1996年雙十節。圖自明周。 P.S.當年我五歲。

話說，好多國民黨人去咗調景嶺，但係其實粉嶺都有好多呢D人。傳說話住軍地（音：gwan1 dei2），但係人哋都係原居民村。

而97前嘅雙十節搞到咁盛大，附近冇可能冇好多國民黨人／國民黨支持者。所以我會相信，由一號橋（即係龍躍頭）一路沿沙頭角公路掃出去嘅鄉郊地方有唔少都係呢類人，甚至聯和墟入面都有。

上年八月大三罷，粉嶺聯和墟有間老店罷咗，然後遭梁政協擺咗落黃店list，聲言要杯葛。但係聽我老豆講，呢間舖就係青天白日反攻大陸藍嚟嘅。

如果呢班人而家係韓粉嘅話，我諗佢哋會俾人唾棄。

咪搞後面發夢中國藍