[而家呃錢]毛筆書法抄歌詞

只有六年功力，請見諒。

Image from WhatsCap.

是咁的，其實我喺2013年11月開始學書法。話短唔短，話長唔長。之但係而家寫出嚟嘅字都叫做見得下人嘅。

不過我諗我都可以同大家講下點解我會走去學書法。

話說，我讀書嘅年代係D小學啱啱開始轉全日制嘅年代，而我間小學比較幸運，我間學校係由上下午校分拆做兩間全日制學校（有部份係上下午校自己合併）。

然而，我間小學分拆嗰年，我啱啱升三年班。咁本身三年班最大件事就係要開始學用毛筆髹顏色（係呀，大家都知個樣其實唔係真係書法嚟。點解用圭筆髹到啱啱好填晒個字嘅窿位會攞甲+，但係真係寫落去嗰D會乙-先？）。

但係唔知係咪我小學分拆有好多admin嘢要處理，我嗰屆升上三年班直至我小六畢業都冇學過書法，最多係睇下ETV叫做學下點揸毛筆咁大把。

就係咁，我一路都覺得細個冇學過書法係我人生嘅一大遺憾。所以我決定咗我大個之後一定要去學書法。

咁啱我asso畢業嘅時候就見到以前讀HD嗰陣識嘅朋友（其實只係見過一次面）都bachelor畢業喇，佢話要創業，做書法有關嘅產品。咁我都唔知點解我當時可以咁厚面皮叫佢教我寫書法，咁佢又肯喎，然後佢嘅書法班又越做越多學生喎。

咁學咗幾年，我平日都開始懶，唔練字，到我上堂嘅時間先喺佢嘅教室入面寫嘢。

不過而家武漢肺炎，佢而家同佢所有學生講停課直至另行通知。咁好喇，我冇得懶喇，我唯有喺屋企自己寫下嘢。

咁最容易當然係抄歌詞喇，咁我就抄咗幾日，本身都係一兩句咁樣。點知大前日我家姐叫我抄成首《新聞女郎》。