如果有睇過我舊文嘅話呢，或者會記得我講過我會食煙嘅。
話說琴日(18/7/2018)，我終於因為我食煙俾人話。原因係：我食紅萬。
話說，識我嘅人之中知道我食煙嘅應該兩隻手十隻手指數得哂（分分鐘五隻手指都得）。
雖然我想學壞，但係我身邊幾乎全部都係乖仔乖女，咁我都冇理由喺佢哋面前食煙，影響到佢哋同埋破壞自己形象㗎嘛。
咁啱我髮型師又知道我食煙，所以我通常就會喺剪頭髮嘅時候瘋狂去滿足自己嘅煙癮。
又話說，因為之前chur FYP同埋堆project，我食多咗好多煙。我諗而家我應該係「煙剷」嘅類別，食少一日煙都見頭暈，集中唔到，搞到成日都要匿入屋企廁所食返支提下神。
今日，我又去剪頭髮（都過咗兩個月先剪㗎喇）。去到髮型屋，呀髮型師哥哥就同我講要等多兩個左右，可以坐低等下。
坐咗陣，我等到冇乜癮，就攞住包紅萬同呀髮型師講，我出出去先。咁我就出咗去食咗兩支煙先返入去。
食完煙返到去都差唔多到我喇，有個新嚟嘅洗頭哥哥（但係佢又有D剪頭髮工具喺自己腰上面個袋㗎啵）就幫我洗頭。
呢位哥哥頭先食飯嗰陣，我見到佢枱上面有包綠色嘅Pall Mall。OK，呢個哥哥都係煙剷嚟嘅。
我放低包煙，然後就跟佢去洗頭先。我都未行到洗頭嗰個位，洗頭哥哥見到我包煙，跟住竟然講：
「咁後生就食紅萬？」
我都應返佢：「我都唔知有咩煙可以食，我求其揀㗎咋。」
「食紅萬溝唔都女㗎。」
「點解呀？」
「紅萬呢，得幾廿歲冇乜錢嘅呀伯先食㗎咋，尼古丁高成倍呀，咁老人家可以食耐D呀嘛。想溝到女呢，食醇萬呀嘛，超醇萬都得。有冇女朋友呀？」
「冇喎。」
「咁食醇萬或者超醇萬喇，唔好食紅萬喇。食紅萬好大陣味㗎，打茄輪嗰陣條女都唔會鐘意喇。」
「咁你食咩煙㗎？」
「薄荷煙啫。冇咁大味呀。」
「我以前都試過其他嘅煙，不過D味道又怪怪地。同埋我食紅萬都有原因嘅。」
「點解呀？」
「我以前煙癮冇咁勁，我想靠紅萬嚟谷大自己嘅煙癮啫。」
「點解要咁做呀？」
「食煙型囉。」
嗱，唔好同我講D咩嘢食煙一D都唔有型。我細個嗰陣同屋企人行商場，嗰陣禁煙條例冇咁勁，去廁所嗰陣成日都會聽到打火機嘅聲，仲成日見到D哥哥喺廁所入面擔住支煙喺度吞雲吐霧，不知幾有型。食煙好有型呢樣係我細個嘅觀察所得，入哂血改唔到㗎喇。
「係呢，真係好型㗎。咁，你做咩㗎？」
「啱啱讀完大學。」
「嗯。大學生食煙呀？主要都係食薄荷煙㗎啵。第時諗住做咩呀？」
「未諗。」
「讀咩科㗎你？」
「語文系。」
「Mmm，咁真係難諗D。仲以為你讀account呀商科嗰D㖭。」
「嗰D易搵工呀。不過我之前都做過嘢嘅。」
「咁你之前做咩㗎？」
「講咗出嚟仲衰。」
「講喇，有咩所謂。」
「我之前教書。」
「教書嘅食煙？型呀！咪十足十漫畫嗰個咩嘢麻辣教師咁囉，不知幾咁型。」（髮型師哥哥附和）
我繼續聽洗頭哥哥講。
「望落你又有D似喎。我中學嗰陣D呀sir都食煙喇，都知道佢哋會鼠埋一邊食㗎喇。有D呀sir仲教埋我哋點食㖭。」
「咁正嘅？不過中學D老師好多都係咁㗎，返工一個樣收工一個樣。」
「係囉，成日都喺班學生面前講到自己有幾咁神聖，不煙不酒咁。咪又係俾大家睇到，所以我就真係唔信喇。」
「係喎，你中學讀邊間呀？」
「（censored，區內band 3，官中)」
「早知我去你嗰間喇。」
「咁你又讀邊間㗎？」
「（censored，區內top 2，英中）」
「嘩！你嗰間先係學校嚟㗎喎。我嗰陣，form 1就俾人㧬咗去食煙、飲酒、賭錢賭大細嗰D喇。」
你又知唔知小六至中一開始返學食煙、飲酒、唔攝衫、唔扣頭兩粒裇衫鈕、唔著或者著黑色底衫、著低腰西褲露黑色底、初中嗰陣著喇叭褲高中嗰陣著窄腳褲、染金毛、gel MK頭、著木板底冇鞋帶嗰款返學皮鞋、日日著黑色船襪、做死臭飛，身邊有班差唔多款嘅死飛仔飛女日日一齊煲煙賭錢玩到好鬼夜甚至喺自己個社區蝦蝦霸霸，全部都係我呢一世都實現唔到嘅願望嚟。（雖然而家睇返，全部都做齊哂嘅話，我個樣應該/絕對會係柒。）就係因為我一向俾人嘅形象係超級乖，我先唔可以做呢D嘢。結果，我中五畢業禮前一日（咁啱返咗學校，著住校服），我先鼓起勇氣喺我屋企樓下一個飛仔攞我人生中第一支煙嚟食：綠luck。
「超，我間學校咪又係有人食煙。」我都只可以將我讀中學嗰陣知嘅嘢講返俾洗頭哥哥知。
「唔係呀話？你間中學都有人食煙？Band 1仔都有人食煙？我真係冇諗過喎。」
「我哋班同學都係知嘅啫，我就未見過嘅，我呢D喺同學眼中嘅乖仔就好少同佢哋接觸嘅。」
對洗頭哥哥呢個band 3仔嚟講原來band 1仔都食煙呢件事係十分震撼。
洗頭哥哥繼續講：「小學老師真係清純得多，我就真係未見過我小學嘅老師出去玩喇。」
我表示認同。
「咁你邊間小學呀？」
我答：「（censored，我屋企樓下間教會學校）。」
「嘩，band 1嚟㗎喎好似。」
乜小學都有banding㗎咩？
「咁你呢？」
「（censored，隔離邨間佛教學校）」
「仲要佛教㖭，咁清心寡欲，梗係唔會出去喇。」
「咁你教中學定小學呀？」
「小學。」
「食住支煙，真係麻辣教師呀。」
「我教補習社啫。」
「咁班細路更加睇唔到你食煙喇。」
「不過我都諗住轉工㗎喇。」
洗完頭，我攞返包紅萬去我前面枱面等剪頭髮。
洗頭哥哥攞埋自己包煙過嚟，比較下D尼古丁含量。佢嘩咗出聲。
「真係爭成倍呀！你一日食唔食到一包呀？」
「唔得，最多嗰次都係一日半包啫。（更正：嗰一日應該係16支，chur緊FYP）食多兩支都會涸喉嚨呀。」
跟住洗頭哥哥繼續忙佢嘅嘢。
我近年次次去髮型屋剪頭髮都係會叫髮型師哥哥同我剪個飛仔頭（都知我食煙囉，咁乖做乜鬼）。今次我叫佢同我剪個短髮嘅飛仔頭。
剪完頭髮。
髮型師哥哥同我講：「嗱，今次就同你剪返短喇，斯文得嚟又串串地咁嘅。」
（返到屋企俾家姐話個髮型似警察😅）
「果然滿足哂我所有嘅要求呀吓。又要俾人睇到我乖，但係又要人睇到我唔乖嘅一面。」
洗頭哥哥終於搞掂咗佢要處理嘅嘢，返咗過嚟。
聽完佢同我講呢D嘢，我都要識做，唔食紅萬喇。
俾錢嗰陣，見到洗頭哥哥枱面包煙開咗，梗係要把握機會問下嘢喇。
我：「喂，你呢隻煙叫咩名呀？」
洗頭哥哥：「呢隻叫深綠威呀。」
我完全諗唔明點解倫敦Pall Mall呢條街會有個「威」字。
我：「呢個牌子叫『威』？」
髮型師哥哥插嘴：「係呀，深綠威呀。」
洗頭哥哥：「咁其實我叫呀威，咪食深綠威囉。仲有呀，如果你頂唔順嘅話可以食淺綠嗰隻先。」
髮型師哥哥：「溝女嘅話，梗係要食條女嗰隻煙㗎喇。」
我：「我都冇乜friend食煙。」
髮型師哥哥：「咁你識其他女仔嗰陣咪可以遞人哋食嗰隻煙俾條女囉。總之條女食乜，你就食乜就得㗎喇。」
髮型師哥哥，乜你食煙㗎咩？仲有，你結咗婚，個仔都讀小學㗎喇啵。
洗頭哥哥：「而家D女食嗰D煙個名好奇怪嗰喎。點食呀？」
我：「係囉，點食啫。食返D普通嘅咪好囉。」
跟住我見洗頭哥哥都幾得閒，就諗住叫埋佢一齊出去食返支深綠威先。
洗頭哥哥（搞笑mode）：「你隨便攞喇，佢（髮型師哥哥）會成包咁買返俾我㗎喇。」
最後我攞咗一支啫。食嗰陣就諗，都OK喎，反正而家煙癮都咁大囉，咪可以轉食其他煙，一日食一包咁望落好大癮囉。（唔知點解，我好想食煙食到成身煙除。）
一於就轉食深綠威。下次去剪頭髮再見到呢個洗頭哥哥，我應該要攞包深綠威出嚟，同佢講：「威哥，我跟你㗎喇。」
轉咗食深綠威嘅Day 1，我已經食咗半包煙。呢日都仲未過。我果然變咗煙剷。
