第二次讀PolyU(七)
鑒於我呢D出文速度極慢嘅朋友已經搞到要一個月先出到一個story咁款，而家開始打呢篇story（時間係0043 13/7/2018），一於睇下幾時publish出黎。
上回提要：誰來愛我 小心愛錯 以免彼此無助
所以呢都係時候寫埋exchange喇。
話說基本上我呢科當係senior year intake，係冇得去exchange嘅。
咦？咁咪講完？
我又唔會俾篇文咁快完嘅。因為我覺得去exchange主要都係文化交流嘅事。咁都仲有其他方法離開香港去外國生活下嘅。咁嘅話，PolyU有好多方法幫你出國嘅。
WIE全名係Work-Integrated Education。簡單D講，就係㧬你去做intern，但係你唔只要向工作嘅公司負責，你仲要向大學交返堆report。更賤格係WIE係喺畢業要求入面㗎。即係話，你唔做intern唔使旨意畢業。
不過咁，下下都留喺香港咪好鬼悶？咁大學嘅CAPS (Office of Careers and Placement Services)同唔少外國嘅agency（香港分部啩）有合作，都會幫D學生去外國做intern嘅。
麻煩嘅事就有：你要向CAPS報名先，然後仲要有interview先至會決定你去唔去得。即係話，你GPA唔夠高你唔使點諗。
方法二：Service Learning
Service learning(SL)又係理大D古靈精怪嘅畢業要求。SL係大學入面嘅學科，你要自己reg科。然後每科SL都各具特色，但係都有個共通點：好多嘢做。
同WIE一樣，你可以揀喺香港做（咪去reg D喺香港做嘅SL科囉）或者出外做。出外嘅話呢就要首先pre reg嗰科，然後要過interview，最後仲要睇下科SL嘅時間同你自己個時間表夾唔夾到。夾到你先有得讀。
我當然兩樣都做哂喇，唔係點知會有呢兩招呀。
WIE嗰邊嘅interview首先要交份CV過去CAPS嗰邊，仲要喺佢堆選擇入面揀個你想去嘅地方，然後佢哋嘅職員會同我哋面試兼且睇埋我哋份CV有冇問題。
揀地方呢，因為我喺之前嗰個暑假同個friend chur咗10日歐洲（都係倫敦巴黎同Brussels啫），咁俾我揀嘅有倫敦。三個城市去十日當然唔夠（利申：淨係一個臺北加少少新北淡水我都去七日），有得再去倫敦仲唔即刻揀佢？
咁我比較懶，我將我當年見工嗰張CV執少少就遞出去CAPS嗰邊。Interview嗰陣佢哋都係俾少少建議我再細微執返次再send返俾佢哋就可以。
我嗰陣本身諗住等佢shortlist咗我俾我去外國intern先俾返個CV（佢哋叫我喺入面寫埋GPA）嘅。點知我interview之後等咗成個月佢都未shortlist我。我等到唔耐煩，出咗GPA之後都係寫埋落去交張update咗嘅CV俾CAPS佢哋算。點知佢兩日就shortlist咗我。我嘅感覺係：果然都係睇GPA做人。
之後學校就將我嘅資料send咗去間agency度，就由佢幫我搵intern。不過呢度就要交咗幾千蚊先，然後仲要俾呢間agency in返次，先至再幫我搵工。
呢間中介個system好鬼煩。當然我都揀好咗我做咩類型嘅工，仲過咗個interview嘅（個電話interview主要都係confirm返我係想去倫敦同埋係education或者NGO嘅工啫）。係佢話最多會幫我搵三次工，如果三次人哋都唔請就會refund返比我，如果係我reject嘅話我就冇refund喎。
第一次機會，係喺King’s Cross附近嘅一間英文教學中心。收嘅學生主要都係外地人，上網睇落空間幾大吓。同呢間學校 Skype interview完，佢哋唔請，算。（屋企人懷疑係因為我唔俾佢哋見我個樣所以唔請）
第二次機會，係個環保組織，即係NGO喇。本身見到email係話想約我interview嘅，但係等咗好耐都冇消息。有一日chur住學校D功課定project都要send個email俾agency問下發生咩事。個幾禮拜之後agency覆返話原來間NGO要改組，所以請唔到intern喇。來回多一兩封email之後agency話呢次唔計我嗰三次機會。
再嚟第二次機會。呢次係一間喺Golders Green（當時：邊度嚟？）嘅英文教學中心，同上次嗰間有D似，係up dup咗啲唧。Agency封email寫住呢度見到我CV就想請我喎。
當時晨早流流，我睇錯嘢，以為係interview嘅機會，我就好爽快咁答咗Yes。點知一個鐘頭之後就收到agency封confirmation email，嗰陣先返轉頭睇多次原來係in都唔in直接請。刺激到咁。
呢次劇情風迴路轉，兩個鐘頭之後，我再收到email，話嗰度嘅校長都係想同我傾下喎。咪即係要interview，嘥氣。
幾經辛苦約咗幾廿次時間，同時我其實又要搞英國Tier 5 (Youth Mobility Scheme) visa（即係working holiday visa）。三月左右走咗去香港入境處搞申請呢個visa嘅步驟，四月尾傾完計，五月終於遞好份網上申請表，五月尾去埋銅鑼灣應該係英國大使館外判咗出去嘅機構度做埋最後嘅程序。六月尾左右終於喺我本特區護照度貼咗我張visa喇。
住宿方面就agency幫手Air B&B處理咗嗰個幾月嘅住宿問題。
（米奇聲：攞到耳仔喇，好嘢！）
（BTW，點解我91年香港出世都冇BNO。）
七月中飛倫敦八月尾飛返嚟。Intern咁就完咗，跟住學校就不斷喺度追report喇。
（倫敦intern所見所聞另上，敬請留意。）
學校追report其中一個原因就係佢會俾返錢我。我俾咗四萬幾去間agency度，最後學校都俾返四萬多少少俾我。算係咁。
（暫時電話睇見到好鬼長，相信SL部份見聞都要另上）
讀呢科SL其實係撞棍。
由於讀嗰陣都final year sem 2，最chur嗰陣讀，真係攞自己條命。不過interview係之前嗰個sem嘅12月。
咁啱有個seminar講SL科。又咁啱我哋班同學見到封email。又咁啱我同咗幾個同學去聽（包括叫佢跑嗰個）。
就係咁，我見到有科係去臺南教英文。兩個同學就見到有得去盧旺達。大家最後都入到想去嘅呢D科嘅。
不過我揀嗰科其實係大科，有四group：香港、柬埔寨、臺南、中國大陸。我最初頭揀錯group揀咗柬埔寨，到約interview先知揀錯，最後要send email講返。好彩佢又俾我in返臺灣嗰邊，又入咗。
Sem 2嗰陣每個禮拜有上返兩個鐘嘅堂，交兩三份古靈精怪嘅功課，仲有group presentation。不過嗰陣就要處理哂入臺證等等嘅事。（嗱，住宿同旅遊巴就係學校出嘅）
今年五月尾先去臺南，去十日之後就返嚟。然後一個禮拜內要交哂最後嘅嗰堆功課。交完之後個幾禮拜老師就出返哂功課嘅分。
咁亦都即係話我大學生活都要寫個句號落去喇。我而家都只係等埋八月公佈埋最後呢科嘅成績就可以畢業喇。
基本要講嘅大學生活都講到七七八八，當然我仲有D零碎嘅topic可以講，但係起碼我覺得而家我終於可以開始寫其他嘅嘢喇！
