男人打排球
利申:我冇睇《男排女將》
Sep 24, 2021
今屆東京奧運尾二嗰日,我去咗我家姐屋企睇BB,我開電視,睇住96台,咁啱佢播緊男排銅牌戰(即係阿根廷對巴西)。
由於我細個睇嘅都係女排,所以唔知男排有咩好睇。上一屆我好似都有睇兩分鐘左右就轉咗台,因為好似「嘭」咗兩三聲就完咗一球,好快搞掂。當時感覺男排同男子體操都係嗰味嘢:力的表現。
呢D男女stereotypes嘅問題我都會記起自己喺12年問Facebook點解冇男子藝術體操。答嘅朋友都只係講美感同「力的表現」嘅問題,其實我覺得答唔到我。又話要兩性平等嘅?點解到而家都仲有運動項目冇男人參加㗎?我想有人好明確咁答到我,點解到而家都冇男子藝術體操同男子韻律泳啫。有嘅話我好樂意去學絲帶舞。