我嗰陣用緊電話（Android app），用唔到private message，我都好想用呢個方法同你講。我睇你嘅文章都一段時間，我都知道你有專人幫你睇文執錯字。即係話，其實我都知我冇需要衝出嚟同你捉錯字。

我同你之前有過一連串嘅對答。係你令我明白，我只需要做好自己，唔需要有任何嘅比較。我唔係為咗取笑你或者貶低你而出呢個回應，我單純係戥個「迥」字唔抵。我都諗過，我係咪應該自己出篇文講下呢個字。但係我講呢個字嘅話，一嚟我自己嘅個人文章入面未有計劃寫呢類「中文母語者常犯錯誤，而我淺薄嘅語言學知識未必解釋到」嘅文章。或者呢次機會都係一次啟發，令我睇多少少資料，從而可以開新嘅文章系列。

我而家都理解到你點解會為我呢篇回應而大動肝火。但係，如果為咗呢個「 [兜]口兜面撻個message喺度[刷]存在感」嘅人回應，然後令到嗰個人深感萬分抱歉要出道歉文嚟「刷存在感」，我覺得十分不值。

我由2018年2月開始打文，直至而家我原來都打咗四十幾篇文。我明白呢個文章數量真係蚊髀同牛髀，但係我都好肯定我自己都有打錯字。每個人都會錯，不過我都好希望有人可以幫我執下錯字，起碼咁即係話真係有人閱讀我嘅文章，而唔係「拍手=閱」。

你嘅閱歷比我豐富。而你嘅文章亦都啟發到唔少嘅讀者，包括我呢個「 一定要當面指出人哋嘅錯誤，先會感覺良好」嘅小薯仔。我雖然係讀語言出身，但係我唔識運用語言，呢樣係我嘅不足，我唔可以原諒自己呢個不足。我希望你會俾D時間我，可以俾我努力改進。

去到最後，我必須為我當時嘅魯莽向你致歉。